काठमाडौं– नेकपाका दुई अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच मन्त्रिमण्डल हेरफेरका विषयमा छलफल भएको छ ।

मंगलबार विराटनगर पुगेका प्रचण्डले आफू मन्त्रिमण्डल हेरफेरका विषयमा प्रधानमन्त्री अ‍ेलीसँग कुरा गरेर आएको बताए ।

‘आज विहान मात्र प्रधानमन्त्रीसँग मन्त्रिमण्डल हेरफेरका बारेमा कुरा भएको थियो’ प्रचण्डले भने,‘ हेरफेरको कुरा प्रधानमन्त्रीले कसरी हिसाव गर्नु भएको छ त्यसमा भर पर्छ ।’
प्रधानमन्त्री ओलीले मन्त्रीहरुको काम कारवाहीलाई हेरिरहेको भन्दै प्रचण्डले त्यसको आधारमा मन्त्रिमण्डल पुनर्गठन हुने बताए ।

‘म हेरिहेको छु,’ प्रधानमन्त्री ओलीले आफूलाई भनेको बताउँदै प्रचण्डले भने,‘दुई अध्यक्षका बीचमा सल्लाह गरेर गर्ने पर्‍यो भने हेरफेर हुनुपर्छ । तर अहिले हतारो छैन भन्ने भयो ।’

यो प्रधानमन्त्रीको कार्यक्षेत्र भएको बताउँदै प्रचण्डले आफूले प्रधानमन्त्रीलाई उहाँको मूलायांकनका आधारमा गर्न सल्लाह सुझाव दिएको बताए ।