काठमाडौं- प्रहरीले त्रिभुवन अन्तर्राष्ट्रिय विमानस्थलबाट मलेसियन पासपोर्टधारी तीन जना श्रीलंकन नागरिकलाई पक्राउ गरेको छ ।

विहीबार अपरान्ह कतार एयरवेजको उडान नम्बर ६५१ बाट दोहा उडान भर्नका लागि बोर्डिङ पास समेत लिइसकेका उनीहरुलाई प्रहरीले पक्राउ गरेको हो ।

पक्राउ पर्नेमा तनुषा जेवामनी,राबुशान जेवामाङ र इबराब्रु बचा रहेको प्रहरीले जनाएको छ ।

उनीहरु दोहा हुदैँ इटली जान लागेका थिए। अध्यागमनका अधिकृत उनीहरुमाथि प्रश्न गरेपछि उनीहरुले आफू श्रीलंकन नागरिक भएको स्वीकार गरेका थिए।

प्रारम्भिक अनुसन्धानका क्रममा उनीहरुले बोकेको मलेसियन पासपोर्टसमेत नक्कली भएको खुल्न आएको अध्यागगमन विभागका महानिर्देशक इश्वर राज पौडेलले जानकारी दिए।

पक्राउ परेका तीनै जनाले आफ्नो पासपोर्ट च्यातेर युरोप छिर्नका लागि नक्कली मलेसियन पासपोर्टको सहायता लिएको बताएका छन्।