मानिसको संवेदनशील अंगमा कान पनि पर्ने गर्दछ । कानको सहयताबाट हामी कुनै पनि ध्वनि सुन्ने गर्दछौँ ।

कानको संवेदनशीलता यतिसम्म हुन्छ कि कानमा थोरै पानी वा कुनै सानो वस्तु छिरेमा हामीलाई निकै पीडा हुने गर्दछ । अझ सानो आकारको कुनै जीवित भुसुना, कमिला वा किरा छिरे कानभित्र गुज्गुजाउनुका साथै असह्य पीडा हुने गर्दछ । तर के तपाई, कोही ब्यक्तिको कानमा ११ वटा साङ्गलो हुनसक्छ भनेर पत्याउनु हुन्छ ?

घटना चीनको हो । चीनका एक युवाको कानमा ११ वटा साङ्गलो फेला परेको छ ।

चीनको ग्वाङ्ग्जाओ प्रान्तको हुआंग जिल्लाका २४ बर्षीय युवा ल्वुको कानबाट चिकित्सकले ११ वटा जिउँदो साङ्गलो निकालेका छन् ।

राति सुत्ने बेलामा दाहिने कानमा अत्यधिक पीडा भएपछि ल्वु स्थानीय सनेह अस्पताल भर्ना भए । जहा उनको कानबाट चिकित्सकले ११ वटा जिउँदो साङ्गलो निकाले । उनका कानमा एक माउ साङ्गलोसहित त्यसका १० वटा साना बच्चाहरु थिए ।

चीनको डेली एक्सप्रेसकाअनुसार सनेह अस्पतालको नाक, कान घाटी (इएनटि) वार्डका चिकित्सकले ल्वुको कानबाट ११ वटा जिउँदो साङ्गलो फेला पारेको हो । बिरामी ल्वुका अनुसार केही दिन अघि उनको दाहिने कानमा भित्र–भित्रै चिलाउने र दुख्ने गर्दथ्यो ।

केही दिनसम्म यस समस्यालाई साधारण ठानेर उनले वास्ता गरेनन् । तर कानमा लगातार दुखाई बढेपछि ल्वु पीडा सहन नसकी अस्पताल भर्ना भएका थिए । जहाँ चिकित्सकले उनको कानमा यताउती घुमिरहेको १० वटा साङ्गलोको बच्चा देखे र तत्काल उपचार थाले ।

चिकित्सकले ल्वूको कानमा साधारण मेडिकल चिम्टीको सहयोगमा ठूलो शरीर भएको एउटा साङ्गलोसहित त्यसको १० बच्चा निकाले । चिकित्सकका अनुसार ल्वुको कानमा साङ्गलो पस्नुमा उनकै दोष देखिएको छ ।

सुत्ने बेलामा उनी ओछ्यानमा प्याकेट चिप्स राखेर खाने गर्दथे । जसको गन्ध र आर्कषणको कारण माउ साङ्गलो ओछ्यानमा आई उनको कानमा पस्यो र त्यही बच्चा पार्याे ।