यही मङ्सिर ६ गतेबाट प्रदर्शनमा आउने चलचित्र ‘च च हुई’ को क्यारेक्टर पोस्टर सार्वजनिक गरिएको छ । यसअघि गीत र ट्रेलरमार्फत दर्शकमाझ पुगेको निर्माण टिमले चलचित्रको प्रचारमा थप सहयोग पुगोस् भनेर क्यारेक्टर पोस्टर सार्वजनिक गरेको हो ।

पोस्टरमा चलचित्रका चार शीर्ष कलाकार आर्यन सिग्देल, भोलाराज सापकोटा, मिरुना मगर र माओत्से गुरुङलाई छुट्टाछुट्टै रुपमा देखाइएको छ ।

लभस्टोरी चलचित्रमा धेरै दोहोरिने आर्यनलाई यो चलचित्रमा फरक भूमिकामा देख्न सकिनेछ ।

दुई बेकामे युवाको जीवनमा एक पुस्तकले ल्याउने उतारचढावलाई चलचित्रमा देखाइएको छ । चलचित्रलाई साम्तेन भुटियाले निर्देशन गरेका हुन् भने सम्पादन पनि भुटियाकै छ । यस्तै चलचित्रमा पुष्कर गुरुङ, आर्जेस रेग्मी, बबिता मल्ल लगायतका कलाकारले समेत अभिनय गरेका छन् ।

रोमान्टिक कमेडी जनरामा निर्माण भएको यो चलचित्रमा अमृत घोले लामाको लगानी, सुसन प्रजापतिको छायांकन तथा सिजन दाहाल र सन्देश अर्यालको पटकथा छ ।