वाशिङ्टन– अमेरिकी राष्ट्रपति डोनाल्ड ट्रम्पले आफ्ना राष्ट्रिय सुरक्षा सल्लाहकार जोन बोल्टनलाई पदबाट हटाइदिएका छन् ।

पछिल्लो ३ वर्षमा राष्ट्रिय सुरक्षा सल्लाहकारको पदबाट हटाइनेमध्ये बोल्टन तेस्रा व्यक्ति हुन् ।

अमेरिकी राष्ट्रपति ट्रम्पले ह्वाइट हाउस (राष्ट्रपति कार्यालय)लाई अब बोल्टनको सेवाको आवश्यकता नरहेको बताएका छन् । बोल्टनका धेरै निर्णयप्रति आफ्नो घोर आपत्ति रहेको पनि ट्रम्पले उल्लेख गरेका छन् ।

तर, बोल्टनले भने आफूले राष्ट्रिय सुरक्षा सल्लाहकारको पदबाट राजीनामा दिएको दाबी गरिरहेका छन् ।

राष्ट्रपति ट्रम्पले सन् २०१८ को अप्रिलमा बोल्टनलाई राष्ट्रिय सुरक्षा सल्लाहकारको पदमा नियक्त गरेका थिए । बोल्टन माइकल फ्लिन र एचआर मेकमास्टर पछि राष्ट्रपति ट्रम्पका तेस्रो राष्ट्रिय सुरक्षा सल्लाहकार हुन् ।

बीबीसीका अनुसार अफगानिस्तानको विषयलाई लिएर राष्ट्रपति ट्रम्पले बोल्टनलाई पदमुक्त गरेका हुन सक्छन् । तालिबान नेतासँगको प्रस्तावित शान्ति वार्ता रद्द गर्ने ट्रम्पको निर्णयप्रति बोल्टनले आलोचना गरेका थिए ।