ललितपुर– ललितपुर महानगरपालिकाले ‘बिउ एटीएम’ पनि संचालनमा ल्याएको छ । ललितपुर महानगरपालिकाले सहरी खेती साझेदारी कार्यक्रम अन्तरगत कृषकहरुलाई उन्नतस्तरको बिउ एटीएममार्फत् उपलब्ध गराउने गरी सो एटीएम संचालनमा ल्याएको हो ।

आइतबार ललितपुरमा एक कार्यक्रममा बीच कृषि तथा पशुपंक्षी विकास मन्त्रालयका सचिव युवकध्वज जिसीको उपस्थितिमा ललितपुर महानगरपालिकाका मेयर चिरिबाबु महर्जनले सो प्रविधिको पनि उद्घाटन गरेका हुन् । उनले सहरी कृषकहरुको उत्पादनमा बढावा दिने उद्देश्यका साथ उन्नत विउ विजन वितरणका लागि बिउ एटियमको पनि व्यवस्था गरिएको स्पष्ट पारे । त्यसमा ३६ जातका तरकारी तथा फलफूलको उन्नत विउ पाउने व्यवस्था पनि गरिएको ललितपुर महानगरपालिकाले जनाएको छ ।

२०, ५० र १०० मूल्यका सफा नोट एटीएममा घुसाएपछि उनीहरुले चाहे अनुसारको बिउको चित्र आउने र सोही चित्रमा थिचेपछि आवश्यक बिउ प्राप्त गर्ने व्यवस्था सो एटीएम गरिएको छ ।

ललितपुर महानगरपालिकाले ‘पानी एटीएम’ पनि संचालन गरिसकेको छ । मेयर महर्जनले सहरी क्षेत्रको उचित व्यवस्थापनका लागि ‘साईकल लेन’को व्यवस्था गर्ने कामलाई पनि अघि बढाइएको जानकारी दिए ।

कार्यक्रममा बोल्दै कृषि तथा पशुपंक्षी विकास मन्त्रालयका सचिव जिसीले प्रदेश र स्थानीय सरकारसँग मिलेर कृषि उत्पादनमा बढावा दिन नयाँ–नयाँ प्रविधिको विकास गर्न सरकार तयार रहेको बताए । उनले कृषिमा निर्भर मुलुकलाई अघि बढाउन कृषि क्षेत्रको विकासमा तीन वटै तहबीच मिलेर काम गर्नुपर्नेमा पनि जोड दिए ।

ललितपुर महानगरपालिकाले नौं लाख लगानीमा स्थापना गरेको सो मेसिनको सेवा सबै वडामा संचालनमा ल्याउने तयारी पनि गरेको छ ।