काठमाडौं – नेपाली राष्ट्रिय महिला फुटबल टोलीको अभ्यास नक्सालस्थित नेपाल प्रहरीको मुख्यालयको मैदानमा हुने भएको छ ।

अखिल नेपाल फुटबल संघ (एन्फा) ले अब महिला टोलीले १३ औं दक्षिण एसियाली खेलकुद (साग) को तयारी नक्सालमा गर्ने जानकारी दिएको हो ।

यसअघि असार १२ गतेदेखि महिला टोली सातदोबाटोस्थित एन्फा मैदानमा अभ्यासरत थियो । तर असार १६ गतेदेखि सागकै अभ्यासका लागि यु–२३ पुरुष टोली पनि अभ्यासमा जुटेपछि यी दुई टोलीले मैदान बाँडेर अभ्यास गर्दै आएका थिए ।

दुवै टोलीको साझँ ५ देखि ७ बजेसम्मको अभ्यास तालिका भएपछि दुई टिमले आधाआधा मैदानमा अभ्यास गर्दै आएका थिए ।

मैदान अभावको विकल्पमा एन्फाले महिला टोलीको अभ्यास नक्सालमा गर्ने तयारी गरेको हो । महिला टोलीको अभ्यास समय भने पुरानै तालिका अनुसार रहेको एन्फाले जनाएको छ ।