हङकङ– अधिक स्वतन्त्रता र प्रजातन्त्रको माग गर्दै हङकङमा आइतबार पनि दशौं हजारले प्रदर्शन गरेका छन् । प्रदर्शनकारीले हङकङको ठाउँठाउँमा प्रदर्शन गरेका हुन् ।

प्रहरीले प्रदर्शनलाई गैरकानूनी भनेपनि त्यसको परवाह नगरी दशौं हजारको सङ्ख्यामा प्रदर्शनकारी सडकमा उत्रेका हुन् । प्रदर्शनकारी र प्रहरीबीच हङकङका विभिन्न स्थानमा झडप भएको समेत अन्तर्राष्ट्रिय सञ्चारमाध्यमले जनाएका छन् ।

प्रहरीले प्रदर्शनकारीलाई लक्षित गर्दै अश्रुग्यास र रबरको गोली प्रहार गरेको र जवाफमा प्रदर्शनकारीले आगजनी, तोडफोड र ढुङ्गामुढा प्रहार गरेको अन्तर्राष्ट्रिय सञ्चारमाध्यमले जनाएका छन् । त्यसबाहेक प्रदर्शनकारीहरु तीन दिनयता हङकङको अन्तर्राष्ट्रिय विमानस्थलमा शान्तिपूर्ण धर्नामा बसिरहेका छन् ।

दुई महिनाअघिबाट शुरु भएको प्रदर्शन समयसँगै हिंसात्मक बन्दै जाँदा त्यहाँ ठूलो राजनीतिक संकट देखा पर्दै गएको विश्लेषण गरिएको छ । प्रदर्शनकारीले हङकङकी प्रमुख कार्यकारी क्यारी लामको राजीनामा माग्दै आएका छन् भने प्रहरीद्वारा प्रदर्शनकारीमाथि गरिएको हिंसात्मक व्यवहारको पनि स्वतन्त्र छानबिन हुनुपर्ने माग गर्दै आएका छन् ।