काठमाडौं । नेपाल पत्रकार महासंघले पत्रकारत्रय पुण्यप्रसाद धमला, बालकृष्ण शर्मा र दीपक अर्यालको चरित्र हत्या भएको भन्दै गम्भीर ध्यानाकर्षण भएको जनाएको छ ।

पत्रकारहरु धमला, शर्मा र अर्यालले आफूहरुविरुद्ध टेलिभिजन व्यवस्थापनले चरित्र हत्या गरेको भन्दै महासंघमा उजुरी दिएपछि महासंघले विज्ञप्ति जारी गर्दै ध्यानाकर्षण भएको जनाएको हो ।

एभिन्यूज टेलिभिजन व्यवस्थापनले आज विहान पत्रकारत्रयले सामान नबुझाई टेलिभिजन छाडेकाले भन्दै सामान बरबुझारथ गर्न आउने व्यहोराको सूचना पत्रिकामा प्रकाशन गरेको थियो ।

खबरहवसँग कुरा गर्दै पत्रकार धमलाले आफूहरुसँग टेलिभिजनको कुनै सामान नरहेको तथा टेलिभिजन व्यवस्थापनले समयमा पारिश्रमिक भुक्तानी नगर्दा टेलिभिजन छाडेको बताए ।

त्यस्तै पत्रकार शर्माले पनि पारिश्रमिक समयमै नभएकाले टेलिभिजन छाडेको तर कुनै सामान बुझाउन बाँकी नरहेको दाबी गरे ।