एजेन्सी– अष्ट्रेलियामा शरणार्थीका रुपमा बसोबास गर्दै आएका एकजना बहराइनी फुटबलरलाई थाइल्याण्डले रिहा गरेको छ । बहराइनले उनलाई सुपुर्दगी गर्न गरेको माग फिर्ता लिएपछि उनलाई राजधानी बैंककको जेलबाट रिहा गरिएको थाई अधिकारीले जनाएका छन् ।
उनी जेलबाट रिहा हुनेबित्तिकै अन्तर्राष्ट्रिय विमानस्थल पुगेको बताइएको छ ।

सन् २०१४ देखि अष्टे«लियामा शरण लिइरहेका बहराइनी फुटबलर हकिम अल अरइबीलाई गत नोभेम्बरमा हनिमुन मनाउन थाइल्याण्ड आएका बेला बहराइनको आग्रहमा अन्तर्राष्ट्रिय प्रहरी संगठन इन्टरपोलको सूचनाका आधारमा विमानस्थलबाट पक्राउ गरिएको थियो ।

उनीमाथि बहराइनमा सन् २०११ मा भएको सरकारविरोधी प्रदर्शनमा सहभागी भएर विभिन्न अपराध गरेको अभियोग लागेको छ ।
त्यसपछि बहराइनले उनलाई सुपुर्दगी गर्नका लागि थाइल्याण्डसमक्ष आग्रह गरेको थियो ।

तर, बहराइनले उनलाई सुपुर्गदी गर्न गरेको आग्रह फिर्ता लिएपछि उनलाई रिहा गरिएको हो । यद्यपि बहराइनले उनलाई सुपुर्दगी गर्न गरेको आग्रह किन फिर्ता लिएको हो भन्ने स्पष्ट नभएको जनाइएको छ ।

उनलाई पक्राउ गरिएको विषयलाई लिएर अन्तर्राष्ट्रियस्तरमा चर्को आलोचना भएको थियो ।