एजेन्सी– अभियुक्तलाई सर्पको प्रयोग गरी जबरजस्ती अपराध स्वीकार गर्न लगाउने इण्डोनेशियाली प्रहरीले माफि मागेको छ । इण्डोनेशियाको सुदुर पूर्वमा रहेको पपुवा प्रान्तमा प्रहरीले अभियुक्तको घाँटीमा जिउँदो सर्प राखेर अपराध कबोल्न बाध्य पारिएको भिडियो भाइरल भएको थियो ।

प्रहरीले विज्ञप्ति जारी गर्दै अभियुक्तको घाँटीमा सर्प बाँध्ने प्रहरीलाई अनुशासनको कारवाहीको प्रकृया अघि बढाइएको जनाएको छ । भिडियोमा दुबै हात बाँधिएका अभियुक्तलाई प्रहरीले ‘‘कतिओटा मोबाइल चोरेको थिस् ?’’ भन्दै प्रश्न सोधेको देखिएको थियो । डरले चिच्याउँदै अभियुक्तले ‘‘दुईवटा’’ भनेको भिडियोमा देख्न सकिन्छ ।

प्रहरीको यस्तो घटना अमानवीय भएको भन्दै व्यापक आलोचना भएको थियो । पृथकतावादी आन्दोलन चलिरहेको इण्डोनेशियाको पपुवा क्षेत्रमा प्रहरीले मानव अधिकार हनन् गरेको समाचार नियमित आउने गर्छ ।