एजेन्सी– शनिबार लिभरपुल भन्दा ३ अंकले पछि परेको म्यानचेस्टर सिटी आइतबार चेल्सीलाई पराजित गर्दै पुनः शीर्ष स्थानमा उक्लिएको छ ।

आइतबार राति घरेलु मैदानमा चेल्सीविरुद्ध सर्जियो अग्युरोको ह्याट्रिक प्रेरित सिटीले चेल्सीमाथि ६—० को शानदार जित हासिल गरेपछि शीर्ष स्थानको लिभरपुललाई पछि पारेको हो ।

सिटीका लागि ह्याट्रिक नायकको पहिचान बनाएका अग्युरोले ह्याट्रिक गर्दा पाउल स्ट्रलिङले दुई गोल गरे भने पेपे गोन्डोगानले एक गोल गरेपछि सिटीले चेल्सीलाई फराकिलो अन्तरले पराजित गर्यो ।

शीर्ष स्थानको लिभरपुलसँगको दूरी घटाउने महत्वपूर्ण खेलका रुपमा हेरिएको चेल्सीसँगको खेलमा सिटीका खेलाडीले उत्कृष्ट लय समात्दै आफूलाई शीर्ष स्थानमा पुर्या‍उन सफल भए ।

जितसँगै सिटी र लिभरपुलको समान ६५—६५ अंक भएपनि गोलअन्तरका आधारमा सिटी शीर्ष स्थानमा पुगेको हो ।

घरेलु मैदानमा उत्साहित देखिएको सिटीका लागि स्ट्रलिङले खेलको चौथो मिनेटमा गोल गरेपछि टिमले १—० को अग्रता बनाएको थियो । १—० को अग्रता बनाएको सिटीका लागि अग्युरोले १३ औं र १९ औं मिनेटमा व्यक्तिगत २ गोल गर्दा सिटी सहज अवस्थामा थियो । त्यस्तै, सिटीका लागि २५ औं मिनेटमा गोन्डोगानले गोल गर्दा पहिलो हाफमा सिटीले ४—० को फराकिलो अन्तर बनाइसकेको थियो ।

५६ औं मिनेटमा चेल्सीका खेलाडीले सिटीका खेलाडीमाथि फाउल गर्दा पाएको पेनाल्टीमा अग्युरोले गोल गर्दै चेल्सीविरुद्ध ह्याट्रिक पुरा गर्दा टिम ५—० ले अघि रहेको थियो भने स्ट्रलिङले ८० औं मिनेटमा अर्को गोल थपेपछि सिटीले ६—० गोल अन्तरले चेल्सीलाई हरायो ।

जितहासिल गरेको सिटी शीर्ष स्थानमा उक्लिदाँ पराजित चेल्सीको ५० अंकसहित छैठौं स्थानमा रहेको छ ।