काठमाडौं – फिल्मको प्रचारमा व्यस्त रहेका अभिनेता अनमोल केसीले नेपालगञ्ज पुगेर त्यहाँका फ्यानसँग भेटघाट गरेका छन् । नेपालगञ्जमा आयोजना गरिएको ‘प्रथम प्रादेशिक औद्योगिक लघु, घरेलु तथा कृषि, प्रविधि, व्यापार एवम् पर्यटक महोत्सव २०७५’ मा आएका फ्यानसँग उनले फिल्मको प्रचार गर्दै सेल्फीसमेत लिए ।

सोही कार्यक्रमका लागि फिल्म ‘क्याप्टेन’ निर्माण टिम नेपालगञ्ज पुगेको थियो ।

महोत्सवमा अनमोल आउने थाहा पाएपछि उनलाई हेर्न लामो समयदेखि दर्शक प्रतीक्षामा थिए । अनमोलले दर्शकसँग मञ्चबाटै केही प्रश्न समेत सोध्न भ्याएका थिए भने फिल्मका केही संवाद र ‘रहर छ सँगै’ बोलको गीतका केही स्टेप समेत शेयर गरेका थिए । अनमोलले उक्त भीडको सेल्फीलाई सामाजिक सञ्जाल फेसबूकमा पनि शेयर गरेका छन् ।

महोत्सवकै लागि भनेर अभिनेता भुवन केसी र निरुता सिंह पनि त्यहाँ पुगेका छन् । दिवाकर भट्टराईले निर्देशन गरेको फिल्म ‘क्याप्टेन’ आउँदो फागुन १७ गतेबाट रिलिज हुँदैछ ।