धेरै जसो मानिस आफ्नो मन पर्ने खानेकुरा खाँदा मूड फ्रेस हुन्छ भन्ने सोच्छन् । यसको पुष्टि केही अध्ययनहरुले पनि देखाएको छ । तर के तपाईलाई थाहा छ स्वास्थ्कर खानपानले तपाई तनावबाट सुरक्षित हुन सक्नुहुन्छ । हालसालै भएको एक अध्ययन रिपोर्टका अनुसार वजन कम गर्न तथा न्यूट्रिएन्टस् भारपुर भएको खानपान खाँदा डिप्रेसनको समस्या कम हुन्छ ।

साइकोसोमेटिक मेडिसिन जर्नलमा प्रकाशित एक अध्ययनका अनुसार शोधकर्ताको टीमले मानसिक स्वास्थ्यका जाँचका लागि डाइटमा भएको क्लिनिकल ट्रायलको वर्तमान अवस्थाको डाटा अध्ययन गरेका थिए । नजितामा राम्रो र स्वस्थकर खानपान प्रयोग गर्नेमा डिप्रेशनको खतरा कम हुने पाइएको छ ।

अध्ययनका मुख्य लेखक जोसेप फर्थका अनुसार यो अध्ययनलाई पूर्णरुपमा प्रमाणिकरण गर्नका लागि केही थप अध्ययनहरु बाँकी छ तर यो अध्ययनबाट के भन्न सकिन्छ भने स्वस्थकर खानपान गर्नेहरुको मूड राम्रो रहन्छ ।

मानसिक रुपमा स्वस्थ रहनका लागि आफ्नो खानपानमा अधिक न्यूट्रिएन्ट युक्त चीजको प्रयोग गर्नुपर्छ । त्यसका साथै जंक फूड तथा चिनीको सेवनबाट टाँढा रहँदा फाइदा पुग्छ ।