एजेन्सी- तपाईंमा सूर्तीजन्य पदार्थ सेवनको लत छ । यस्तो लत छ भने आजैबाट धूमपान तथा सूर्तीजन्य पदार्थ सेवनले शरीरमा पार्ने प्रभाव बुझ्न आवश्यक छ । निकोटिनलगायतका थुप्रै किसिमका रसायनका कारण तपाईंको स्वास्थ्यलाई दिनप्रति दिन असर पुर्‍याइ रहेको हुन्छ ।

धूमपानले फोक्सो र श्वासप्रश्वास प्रणालीमा सुरुमै असर पार्छ भने क्यान्सरसम्म गराउँछ । बिस्तारै शरीरका आँखा, मुख, पेट, श्वासनली र दिमागलगायत अंगमा असर पुर्‍याउँदै जान्छ।

असर

• धूम्रपान गर्नेमा मात्र नभई वरपरका मानिसमा पनि यसले असर पुर्‍याउँछ। धूम्रपानले बालबालिकाको स्वास्थ्यमा बढी असर पुर्‍याउँछ।
• गर्भवती भएको घरमा परिवारका अन्य सदस्यले धूमपान गरेमा पेटभित्रको बच्चाको स्वास्थ्य पनि प्रभावित हुन्छ। यसले बच्चा कम तौलको जन्मने, खेर जाने र शारीरिक तथा मानसिक विकासमा अवरोध आउने हुन्छ।
• शिशुमा क्यान्सर हुने सम्भावना उच्च रहन्छ। त्यस्तै, भविष्यमा बच्चाले धूम्पान गर्न सक्ने सम्भावना हुन्छ।
• बच्चा जन्मेदेखि नै श्वासप्रश्वाससम्बन्धी रोग लाग्न सक्छ। गर्भवती महिलाले धूम्पान गरेमा पाठेघरबाहिर गर्भ रहने, बच्चा सुस्तमनस्थितिको हुने, तौल कम हुने र कतिपय अवस्थामा बच्चा मर्न सक्ने पनि हुन्छ।
• गर्भमा रहेका बच्चाको विकासको क्रममा अवरोध आउने, उचाइ कम हुने र समयअगावै जन्मने खतरा हुन्छ। बालबालिकामा चुरोटको धुवाँ र गन्धले समयमा भोक नलाग्ने तथा शरीर कमजोर हुँदै जान्छ।
• चुरोट पिउनेमध्ये ८७ प्रतिशत मानिसको मृत्यु फोक्सोको क्यान्सरका कारण हुने गर्छ।
• धूमपानले मानिसको आयु छोट्याउँदै लान्छ। एजिङको समस्या निम्त्याँउछ। विश्वमा धूम्रपान गर्नेमध्ये आधा जनसंख्याको अकालमै मृत्यु हुने गर्छ। अमेरिकामा प्रत्येक पाँच मिनेटमा एकजनाको चुरोट सेवनबाट मृत्यु हुने गरेको तथ्यांक छ।
• यस्तै, नियमित धूमपान गर्ने व्यक्तिमा मुट र भास्कुलर सिस्टममा समस्या, निमोनिया, मधुमेह, क्यान्सर हुने गर्छ।
• निकोटिनको लत हिरोइन र रक्सीको भन्दा पनि कडा हुने भएकाले सजिलै छोड्न सकिँदैन। आर्थिक भार बढ्दै जान्छ।
• शरीरमा भएको एन्टिअक्सिडेन्टको मात्रा घटाउँछ। रक्तचाप बढाउने भएकाले हृदयाघात र स्ट्रोकको सम्भावना बढ्छ। कतिपयमा डिमेन्सिया हुने खतरा रहन्छ।
• दाँत र गिजामा समस्या उत्पन्न हुनुको साथै मुखको क्यान्सरको सम्भावना उच्च हुन्छ। त्यस्तै, आन्द्रामा समस्या निम्त्याउँछ।
• चुरोट सेवन गर्ने महिलामा महिनावारी गडबडीको समस्या हुन्छ।
• छाला फुस्रो, पहेँलो र खुम्चिने हुन्छ। कतिपय अवस्थामा छालामा रगत नपुगेर तन्किने सम्भावना हुन्छ। बिस्तारै स्वाद थाहा पाउने र सुँघ्न सक्ने शक्तिमा ह्रास आउन थाल्छ।