जावलाखेल– सर्वसाधारणलाई समेत विज्ञान तथा प्रविधिबारे जानकारी दिने उद्देश्यसहित ललितपुरस्थित जावलाखेलमा ‘विज्ञान सडक मेला’ आयोजना गरिएको छ । नेपाल विज्ञान तथा प्रविधि प्रज्ञा प्रतिष्ठानले उक्त मेला आयोजना गरेको हो ।

मेलामार्फत सर्वसाधारणलाई विज्ञान तथा प्रविधिको क्षेत्रमा भएको विकासका नयाँ–नयाँ आविस्कार र अवधारणाबारे जानकारी दिइने जनाइएको छ ।

कार्यबाहक प्रधानमन्त्री तथा रक्षामन्त्री ईश्वर पोखरेलले मंगलबार मेलाको उद्घाटन गरे । मेलाको उद्घाटन गर्दै पोखरेलले जनताको जीवनमा समृद्धि ल्याउने गरी खोज तथा अनुसन्धानको क्षेत्रमा काम गर्न वैज्ञानिकहरुलाई आग्रह गरे ।

जनताका लागि उपयोगी नहुने ज्ञान तथा विज्ञानको कुनै पनि अर्थमा काम नहुने मन्त्री पोखरेलको भनाइ छ ।

सरकारले विदेशमा रहेका नेपाली वैज्ञानिकहरुको ज्ञान, सीप र दक्षताको स्वदेशमै उपयोग गर्न जोड दिएको पनि पोखरेलको भनाइ थियो ।