काठमाडौं– अर्थमन्त्री डा. युवराज खतिवडाले नेपालमा दक्षिण एशीयाकै सबैभन्दा सुदृढ बैंकिङ प्रणाली रहेको दाबी गरेका छन् ।

बैंकिङ प्रणाली राम्रो भएकै कारण विदेशी बैंकहरुले नेपाली बैंकहरुलाई ऋण दिन शुरु गरेको पनि बताएका छन् ।

पूँजी र निक्षेपको अनुपात मात्रै हेर्दा पनि नेपालको बैंकिङ प्रणाली दक्षिणी एशीयामा सबैभन्दा राम्रो रहेको खतिवडाले दाबी गरे ।

मंगलबार काठमाडौंको टंगालमा निक्षेप तथा कर्जा सुरक्षण कोष कार्यालय भवनको शिलान्यास गर्दै अर्थमन्त्री खतिवडाले बैंकिङ प्रणाली राम्रो भएकाले नेपालमा वैदेशिक लगानी भित्र्ने सम्भावना बढेको पनि बताए ।

भवन शिलान्यास कार्यक्रममा बोल्दै अर्थमन्त्री खतिवडाले निक्षेप विमा कार्यक्रमलाई अझै प्रभावकारी बनाउँदै लैजानुपर्र्नेमा पनि जोड दिए ।

निक्षेप तथा कर्जा सुरक्षण कोषलाई बलियो बनाउन आगामी आर्थिक वर्ष भित्र यसको कोष १० अर्ब पु¥याउने पनि घोषणा गरे ।

कोषलाई बलियो बनाएर विपन्न वर्गलाई पनि बैंकिङ प्रणालीमा समावेश गराउने योजना रहेको अर्थमन्त्रीको भनाइ थियो ।

कार्यक्रममा कोषका प्रमुख कार्यकारी अधिकृत विष्णुबाबु मिश्रले कोषले चालू आर्थिक वर्षको ९ महिनामा २ अर्ब मुनाफा आर्जन गर्न सफल भएको जानकारी दिए ।
सबै प्रदेशमा कोषको शाखा कार्यालय स्थापनाका लागि जग्गा खरिदको काम सम्पन्न गरिएको पनि कार्यकारी अधिकृत मिले जानकारी दिए ।