काठमाडौं– युरोप भ्रमणमा रहेका प्रधानमन्त्री केपी शर्मा ओलीले आज (मंगलबार) बेलायती समकक्षी टेरिजा मेसँग भेटवार्ता गर्दै छन् ।

प्रधानमन्त्री ओलीले बेलायती समकक्षी मेसहित अन्य विशिष्ट व्यक्तिसँग भेटवार्ता गर्ने कार्यक्रम तय भएको जनाइएको छ ।

बेलायती प्रधानमन्त्रीसँगको भेटवार्तामा ओलीले भूतपूर्व बेलायती गोर्खा सैनिकको पेन्सनसँग सम्बन्धित विवाद र उनीहरुका समस्याका विषयमा कुरा गर्ने जनाइएको छ ।

प्रधानमन्त्री ओलीको युरोप भ्रमणबारे जानकारी दिन आयोजित पत्रकार सम्मेलनमा परराष्ट्रमन्त्री प्रदीप ज्ञवालीले भूतपूर्व गोर्खा सैनिकको समस्याका विषयमा बेलायती प्रधानमन्त्रीसँग कुरा हुने बताएका थिए ।

नेकपा नेता भीम रावलले भने बेलायती गोर्खा सैनिकको भर्ती खारेज गर्ने विषयमा छलफल गर्न आफ्नो पार्टीका अध्यक्ष तथा प्रधानमन्त्री ओलीलाई सुझाव दिएका छन् ।

सामाजिक सञ्चाल ट्वीटरमा स्टाटस लेख्दै रावलले भनेका छन्, ‘प्रधानमन्त्रीको बेलायत भ्रमणको अवसरमा विगतमा निरंकुश ब्यवस्थाले थोपरेको अपमानजनक गोर्खा भर्ती सन्धिको पुनरावलोकन गर्दै खारेजीको प्रस्ताव राख्नु र भूतपूर्व गोर्खाहरूले उठाएका समस्याहरूको समाधान खोज्न बेलायती प्रधामन्त्रीसंग कुरा गर्नु उचित हुनेछ ।’

प्रधानमन्त्रीको बेलायत भ्रमणको अवसरमा विगतमा निरंकुश ब्यवस्थाले थोपरेको अपमानजनक गोर्खा भर्ती सन्धिको पुनरावलोकन गर्दै खारेजीको प्रस्ताव राख्नु र भूतपूर्व गोर्खाहरूले उठाएका समस्याहरूको समाधान खोज्न बेलायती प्रधामन्त्रीसंग कुरा गर्नु उचित हुनेछ ।

— Bhim Rawal (@BhimRawal179) June 11, 2019