काठमाडौं– ३ हजार रुपैयाँ घुससहित पक्राउ परेका सप्तरीको राजविराजस्थित भूमिसुधार तथा मालपोत कार्यालयका नायब सुब्बा र कम्प्युटर अपरेटरविरुद्ध अख्तियारले भ्रष्टाचार मुद्दा दर्ता गरेको छ ।

मोही जग्गाको बाँडफाँट भइ श्रेस्ता कायम गरी जग्गाधनी प्रमाणपत्र (लालपूर्जा) बनाइदिने बहानामा सेवाग्राहीसँग लिएको ३ हजार रुपैयाँ घुससहित नायव सुब्बा राम नारायण शर्मा र कम्प्युटर अपरेटर राजेश कुमार साह पक्राउ परेका थिए ।

अख्तियार दुरुपयोग अनुसन्धान आयोगको इटहरीस्थित कार्यालयबाट खटिएको टोलीले नासु शर्मा र कम्प्युटर अपरेटर साहलाई पक्राउ गरेको थियो ।

पक्राउ परेका दुवैजनाविरुद्ध ३ हजार रुपैयाँ बिगो र जरिवाना र भ्रष्टाचार निवारण ऐन २०५९ अनुसार कैद सजाय मागदावी गर्दै विशेष अदालतमा मुद्दा दायर गरिएको अख्तियार दुरुपयोग अनुसन्धान आयोगको प्रवक्ता रामेश्वर दंगालले जानकारी दिए ।