काठमाडौं – चलचित्र ‘ए मेरो हजुर २’ बाट एकाएक चर्चामा आएका युवा अभिनेता सलिनमान बनियाँको हेटौँडामा क्रेज देखिएको छ । हेटौँडामा जारी औद्योगिक मेलामा उपस्थित दर्शकमाझ सलिनमान पुगेका थिए ।

अभिनेता सलिनमानसँगै निर्माण टिम फिल्म ‘यात्रा’ को प्रचारका लागि महोत्सवमा पुगेको थियो । महोत्सवमा सलिनमानसँगै सलोन बस्नेत , मलिका महत , जाह्नवी बस्नेत , रेअर राई , विशाल सापकोटा , प्रेक्षा बज्राचार्य लगायत पनि पुगेका थिए ।

कलाकारले महोत्सवमा फिल्मको गीत ‘चट्ट रुमाल’ मा डान्स गर्नुका साथै फिल्मका संवाद समेत दर्शकलाई सुनाए ।

महोत्सवमा उपस्थित दर्शकबीच सलिनमानको क्रेज उच्च देखिएको थियो । सलिनमानले ‘नमस्ते हेटौँडा’ भन्दा दर्शकले स्वरमा स्वर मिलाएर हुटिङ गरिरहेका थिए ।

यात्राको क्रममा आउने घटनाक्रमलाई प्रस्तुत गरिएको फिल्ममा फिल्ममा सलोन बस्नेत , जान्वी बस्नेत , जयनन्द लामा , रेअर राई , प्रेक्षा बज्राचार्य , धिरेन शाक्य , राजाराम पौडेल , विशाल कटवाल , समृद्धि राई , योगेश जंग कुँवर , इश्वर पौडेल , नानीकाजी डंगोल , राजेश बिसुराल , इश्वर पौडेल , देशभक्त खनाल , कमल मैनाली , सौगात शर्मा लगायतको अभिनय देख्न सकिनेछ । फिल्ममा विदेशी कलाकारले समेत अभिनय गरेका छन् ।

सम्राट शाक्यको लेखन तथा निर्देशन रहेको यो फिल्म नयाँ वर्षको अवसर पारेर चैत्र २९ गतेदेखि रिलिज हुँदैछ ।