काठमाडौं- ‘जलपरी’ गौरिका सिंहले पुरस्कार स्वरुप सरकारबाट ६५ लाख रुपैयाँ पाउने भएकी छिन् ।

१३औं सागमा ४ स्वर्ण, २ रजत र ३ कास्यपदक प्राप्त गरेकी उनले सरकारले पुरस्कार घोषणा गरेअनुरुप ६५ लाख रुपैयाँ पाउने भएकी हुन् ।

त्यस्तै, दुई स्वर्ण जितेका तेक्वान्दो खेलाडी आयशा शाक्य, कराते खेलाडी मण्डेकाजी श्रेष्ठ र गल्फर सुवास तामाङले जनही २२ लाख रुपैयाँ पाउनेछन् ।

त्यस्तै पुरुष फुटबल टिमले एक करोड २४ लाख पाउने भएको छ । खेलका स्वर्णपदक विजेतालाई एकमुस्ट ९ लाख र जनही पाँच लाख रुपैयाँ दिइने बताइएको छ ।

जसअनुसार स्वर्ण जितेको पुरुष फुटबल टिमले एक करोड २४ लाख रुपैयाँ पाउने भएका हुन् ।

स्वर्ण विजेता प्रशिक्षकका हकमा पाँच लाख रुपैयाँ दिने घोषणा गरिएको छ । यही मंसिर १५ देखि २४ गतेसम्म काठमाडौं, पोखरा र जनकपुरमा सम्पन्न १३औं सागमा नेपालले ५१ स्वर्ण, ६० रजत र ९५ कास्य गरी २०६ पदक जितेको थियो ।