काठमाडौं- पूर्व अर्थमन्त्री  डा रामशरण महतको नयाँ पुस्तक ‘ट्रायल्स, ट्रेमर्स एण्ड होपः पोलिटिकल इकोनोमी अफ कन्टेमपोररी नेपाल’ सार्वजनिक भएको छ ।

बुधबार पूर्व राष्ट्रपति डा. रामवरण यादवले पुस्तक सार्वजनिक गर्दै पुस्तकका विषमा चर्चा गरेका थिए । पुस्तकमा सबै कुरा समेटिएको भएपनि  पूर्वाधार विकासको नाममा वातावरणमा परेको असरको बारेमा  उल्लेख नभएको  तर्क गरे ।

उनले फरक प्रसंगमा चुरे दोहन भइरहेको सन्दर्भमा सरकारले पनि विकासको नाममा विनाश गर्नु नहुने बताए । उनले चुरे विनाश भएको भन्दै विकासको नाममा वातावरणमा असर पुर्‍याउनु नहुने धारणा राखेका हुन् ।

कार्यक्रममा पूर्व अर्थमन्त्री सुरेन्द्र पाण्डेले पुस्तकमा आफ्ना विचार व्यक्त गर्न नसकेको बताए । पुस्तक लेख्ने मान्छे आफ्नो धारणा राख्न डराउनु नहुने भन्दै नागरिकता तथा भूमि सुधार ऐनले नेपालको अर्थतन्त्रमा पारेको विषयमा त्यति धेरै उल्लेख नभएको तर्क गरे ।

अर्थविद् डा स्वर्णिम वाग्लेले पुस्तकले नेपालको अर्थतन्त्र सम्बन्धी सम्पूर्ण कुरा समेटिएको बताउँदै यो पुस्तक नेपाली अर्थतन्त्रबारे बुझ्न चाहनेको लागि एक दस्तावेज भएको बताए ।

महतले पुस्तकमा बहुदलीय, उदार र प्रजातान्त्रिक अर्थविकासको बारेमा समेत चर्चा गरेको र अबको अर्थतन्त्र कसरी चल्नुपर्छ भनेर थाहा पाउनको लागि पनि यो पुस्तक महत्वपूर्ण हुने बताए ।

कार्यक्रममा डा. विन्दु लोहनी, कनक मणी दिक्षित, डा मिनेन्द्र रिजाल लगायतले पुस्तकको बारेमा आफ्नो धारणा राखेका थिए ।पुस्तक नेपालको अर्थ राजनीतिक अर्थ व्यवस्थाको बारेमा रहेको छ ।