काठमाडौं– वैदेशिक रोजगार विभागले शान्तिनगरमा रहेको ओशो रिक्रुटिङ्ग एजेन्सीमा छापा मारेको छ ।

संयुक्त अरब इमिरेट्समा रोजगारीमा युएई जान लागेका एक युवासँग २ लाख ५ हजार लिंदै गर्दा रङ्गेहात म्यानपावरबाट नगद रकम वरामद गरेको विभागले जानकाी दिएको छ ।

युएईको इमिरेट्स कम्पनीमा लाइट ड्युटी ड्राइभर पदमा जानको लागि म्यानपावरले २ लाख ३० हजार माग गरेको पीडित युवासँग दिएको विभागका सूचना अधिकारी भोला गुरागाँईले जानकारी दिएका छन् ।

श्रम स्वीकृति भए पश्चात म्यानपावरले पैसा नदिएसम्म टिकट नदिने भन्दै हप्तौं सम्म कुराएपछी म्यानपावर विरुद्ध विभागमा उजुरी दिएको उनले बताए ।

पीडित युवाको उजुरीका आधारमा विभागको अनुगमन टोली बुधाबर म्यानपावर कम्पनीमा पुग्दा म्यानपावरका अपरेशन म्यानेजरले ती युवाबाट लिएको २ लाख ५ हजार रकम गन्दै गर्दा उक्त रकम जफत गरिएको हो । म्यानपावरले यस अघि भिषा प्रक्रियाका लागि भन्दै २० हजार रकम लिइसकेको पाइएको विभागले जनाएको छ ।

रकम अशुल्ने म्यानपावर कम्पनी सञ्चालक सहित रकम लिने दुई कर्मचारीलाई विभागमा उपस्थित हुन पत्र काटिएको छ । घटनाको थप अनुसन्धान गरि पीडितलाई सरकारले तोकेको लागतमै विदेश पठाउने ग्यारेन्टी गरि म्यानपावरलाई कारवाही गरिने विभागले जनाएको छ ।

पछिल्लो समय विभागले युवासँग तोकिएको लागत भन्दा बढी शुल्क लिने एजेन्ट तथा म्यानपावर विरुद्ध कारवाही प्रक्रिया तीब्र बनाउदै लागेको छ ।