मुम्बई – सलमान खानको फिल्म ‘दबंग ३’ केही महिनापछि रिलिज हुँदैछ । फिल्मको रिलिज मिति नजिकिँदै गर्दा फ्यान पनि उत्सुक भएका छन् ।

सलमान खान फेरि एकपटक चुलबुल पाण्डेको भूमिकामा पर्दामा देखिँदैछन् । फिल्ममा कन्नड सुपरस्टार सुदीपले भिलेनको भूमिका निभाउनेछन् । सलमान र सुदीपबीचको धमाकेदार क्लाइमेक्स सिनको शूटिङ हालै गरिएको छ ।

क्लाइमेक्समा दुवै शर्टलेस हुनेछन् । यो फिल्मको क्लाइमेक्स मात्र २५ दिन लगाएर छायांकन गरिएको थियो । यो कुराको खुलासा भिलेन बनेका सुदीपले खुलासा गरेका हुन् ।

उनले एक अन्तर्वार्ताका क्रममा क्लाइमेक्समा आफ्नो लडाइँ सलमान खानसँग देखाइएको बताएका छन् । उक्त लडाइँमा अन्तसम्म कसले जित्छ भन्ने दर्शकले थाहा नपाउने उनले बताएका छन् ।

‘हामीले क्लाइमेक्स मात्र लगभग २५ दिन छायांकन गरेका थियौँ, २३ दिन त फाइट सिन मात्र छायांकन गरिएको थियो, यो मेरो करिअरको सबैभन्दा लामो क्लाइमेक्स सिन हो,’ सुदीपले भने ।

उनले यो फिल्मको क्लाइमेक्समा सलमान र आफू जनावरजस्तै लडेको बताएका छन् । उनले शूटिङको क्लाइमेक्स खिच्दा निकै धूलो उडेको पनि सुनाए । उनले भने, ‘शूटिङ गर्दा खुबै धूलो उड्यो, जसकारण सास फेर्न पनि गाह्रो भएको थियो ।’

खबरका अनुसार फिल्ममा सुदीपसँगै ५ सय भिलेनसँग सलमान खान एक्लै लड्नेछन् । साथै फिल्ममा १ सय वटा कार खेलौनाझैँ हावामा उड्दै गरेको देख्न सकिनेछ ।

फिल्ममा सोनाक्षी सिन्हा र सई मान्जरेकरको पनि शीर्ष भूमिका रहेको छ । यो फिल्मलाई लामो समयदेखि दर्शकले कुरिरहेका छन् ।