मोटरसाइकल उत्पादक कम्पनी हिरोले इटालीको मिलानमा आयोजना भइरहेको ईआईसीएमए मोटरसाइकल सोमा १६० सीसी कन्सेप्ट मोटरसाइकल प्रदर्शन गरेको छ ।

‘एक्स्ट्रिम १ आर कन्सेप्ट’ नाम दिइएको सो मोटरसाइकलले डिस्कन्टिन्यू गरिएको १५० सीसी ‘ एक्स्ट्रिम स्पोर्ट्सको स्थान लिने अनुमान गरिएको छ । ‘एक्स्ट्रिम १ आर कन्सेप्ट’ बलियो र आकर्षक लुक्समा छ । यसको सार्प लाइनिङ, एग्रेसिभ एलईडी हेडलाइट, मस्कुलर ट्यांक, आर ब्याज, कलर कम्बिनेसन, रेज्ड टेल सेक्सन, सिंगल पिस सीट सेटअपलगायतका विशेषताले मोटरसाइकललाई थप आकर्षक बनाएको छ ।

यस मोटरसाइकलमा दिइएको अपसाइड डाउन फर्क, इन्जिन फेयरिङ र स्लिक टायरले गर्दा ‘एक्स्ट्रिम १ आर कन्सेप्ट’प्रिमियम देखिएको छ । यो एउटा कन्सेप्ट मोटरसाइकल मात्र भएकाले उप्तादन भएर बजारमा आइपुग्दा यसमा यी सवै फिचर समावेश नहुन सक्छन् र केही नयाँ पनि थपिन सक्छन् ।

यस कन्सेप्ट मोटरसाइकलमा १६० सीसीको नयाँ एयर कुल्ड सिंगल–सिलिन्डर इन्जिन दिइएको छ । एक्स्ट्रिम १ आर १५० सीसीको सेग्मेन्टको मोटरसाइकल रुचाउने ग्राहकका लागि यो नयाँ विकल्प हुनेछ । यो मोटरसाइकल २०२० को अन्त्यसम्म बजारमा उपलब्ध हुने जनाइएको छ ।