काठमाडौं– नेपाली फुटबल टोलीका प्रशिक्षक योहान कालिनले चाइनिज ताइपेईविरुद्धको खेलमा नेपालले उत्कृष्ट पुनरागमन गरेको बताएका छन् ।

मंगलबार भएको खेलमा नेपाल चाइनिज ताइपेईविरुद्ध २–० ले विजयी भएसँगै उनले नेपाली टोलीले सोचेको भन्दा राम्रो प्रदर्शन गर्दा खेल नेपालको पक्षमा आएको बताए । उनले नेपाली टोलीलाई जिताउन महत्वपूर्ण दुई गोल गर्ने अन्जन विष्टको चर्चा गरे ।

‘हामी तीन अंकका लागि मैदानमा उत्रिएका थियौं, त्यो पूरा भयो । नेपालले शुरुवातमै गोल गरेपछि खेलाडीमा थप हौसला मिल्यो ।’ प्रशिक्षक कालिनले भने, ‘ताइपइको प्रदर्शन  निकै राम्रो रहँदा रहँदै पनि नेपाली खेलाडीले डिफेन्स मजबुत बनाए, गोल गर्नबाट चुक्यो । ताइपेईका हरेक प्रहारलाई गोलकिपर किरण चेम्जोङले उत्कृष्ट बचाउ गरे । ’

विश्वकप छनोटमा तीन अंक बटुलेको नेपाली टिमले अब अष्ट्रेलियासँग खेल्नेछ । पहिलो खेलमा नेपालले कुवेतसँग ७–० गोल अन्तरले पराजित भएको थियो ।