सोल– उत्तर कोरियाले दुई छोटो दूरीको हतियार परीक्षण गरेको छ । दक्षिण कोरियाली सेनाले जनाएअनुसार उत्तर कोरियाले राजधानी प्योङ्याङ नजिकैको फ्यानगान क्षेत्रबाट दुईवटा छोटो दूरीका क्षेप्यास्त्र प्रहार गरेको र ती क्षेप्यास्त्र कोरियाली प्रायद्विपको पूर्वमा रहेको टापुमा परीक्षण गरेको जनाएको छ ।

क्षेप्यास्त्र करिब ३३० किलोमिटर टाढा कोरियाली समुद्रमा खसेको अन्तर्राष्ट्रिय सञ्चारमाध्यमले जनाएका छन् । यस विषयमा थप अनुसन्धान भइरहेको दक्षिण कोरियाली सेनाको भनाइ छ ।

ह्वाइट हाउसले पनि उत्तर कोरियाली हतियार परीक्षणबारे जानकारी प्राप्त भएको र यसबारे साझेदार मुलुकहरुसँग छलफल भइरहेको जनाएको छ । गत जुलाईयता उत्तर कोरियाले गरेको यो आठौं क्षेप्यास्त्र परीक्षण हो ।

उत्तर कोरियाले अमेरिकासँग वार्ताको तयारी भइरहेको उल्लेख गरेको केही समय नबित्दै नयाँ हतियार परीक्षण गरेको हो । यसअघि उत्तर कोरियाली उपविदेशमन्त्री चोई सोन हुईले आगामी सेप्टेम्बरको अन्त्यदेखि अमेरिकासँग पुनः वार्ता हुने उल्लेख गरेकी थिइन् ।

उनले आफ्नो मुलुकलाई स्वीकार्य हुने नयाँ प्रस्ताव ल्याउन अमेरिकासमक्ष आह्वान गर्दै अमेरिकी प्रस्ताव स्वीकार्य नभएको खण्डमा दुवै देशबीचको वार्ता स्वतः अन्त्य हुने चेतावनी समेत दिएकी थिइन् । वार्ताको प्रस्ताव गरी हतियार परीक्षण गर्ने उत्तर कोरियाली कदमलाई निकै महत्वका साथ हेरिएको अन्तर्राष्ट्रिय सञ्चारमाध्यमले जनाएका छन् ।