काठमाडौं– प्रधानसेनापति पूर्णचन्द्र थापाले आफ्नो सम्पत्ति विवरण सार्वजनिक गरेका छन् ।

भ्रष्टाचार निवारण ऐन २०५९ को दफा ५० को उपदफा (१) अन्तर्गत सार्वजनिक पद धारण गरेको व्यक्तिले आफ्नो सम्पत्ति विवरण सार्वजनिक गर्नुपर्ने व्यवस्थाअनुसार प्रधानसेनापति थापाले आफ्नो सम्पत्ति विवरण सार्वजनिक गरेका हुन् ।

नेपाली सेनाले आफ्नो वेबसाइटमा समेत प्रधानसेनापति थापाको सम्पत्ति विवरण राखेको छ ।

प्रधानसेनापतिले सार्वजनिक गरेको विवरणअनुसार काठमाडौं महानगरपालिका–२६ मा २ सय ८२.१९ वर्गमिटर क्षेत्रफलमा उनको घर छ । उक्त घर आमाबाट बकसको रुपमा पाएको थापाले उल्लेख गरेका छन् ।

प्रधानसेनापति थापाले आफ्नो तथा श्रीमती दिपा थापाको नाममा काठमाडौं र लमजुङमा गरी करिब २० रोपनी जग्गा भएको उल्लेख गरेका छन् ।

प्रधानसेनापति थापाले आफूसँग सुन ५५ तोला, चाँदी ५ सय ९० तोला र अन्दाजी १० लाख रुपैयाँ बराबरको हिरा भएको उल्लेख गरेका छन् ।

प्रधानसेनापति थापाले विभिन्न बैंकमा गरी साढे १७ लाख नेपाली रुपैयाँ र ५ हजार ९ सय ७० अमेरिकी डलर मौज्दात रहेको उल्लेख गरेका छन् ।

प्रधानसेनापति थापाले आफ्नो र श्रीमतिका नाममा गरी विभिन्न कम्पनीको साधारण र प्रमोटर गरी करीब ४३ लाख १५ हजार बराबर शेयरमा लगानी रहेको बताएका छन् ।