जनकपुरधाम– प्रदेश नम्बर २ को सरकारले पनि असोज ३ गते भव्यताका साथ संविधान विदस मनाउने निर्णय गरेको छ ।

प्रदेश २ को मन्त्रिपरिषद बैठकले असोज २, ३ र ४ गते विभिन्न कार्यक्रम गरी संविधान दिवस मनाउने निर्णय गरेको हो ।

संविधान दिवसको अवसरमा असोज २ गते डेंगु लगायत विभिन्न प्रकारका सरुवा रोगको विषयमा जनचेतनामूलक कार्यक्रम सञ्चालन गरिने छ । यस्तै, ३ गते प्रदेशका विभिन्न शहर र नगर क्षेत्रमा सरसफाइ गर्ने निर्णय भएको छ ।

केन्द्र सरकारले भने यसअघि नै भव्यताका साथ संविधान दिवस मनाउने निर्णय गरिसकेको थियो । केन्द्र सरकारले घरघरमा राष्ट्रिय झण्डा राखी दीपावली गरेर संविधान दिवस मनाउन सम्पूर्ण नागरिकहरुमा समेत अनुरोध गरेको छ ।

संविधान जारी हुँदाका बेला आन्दोलनमा रहेको २ नम्बर प्रदेश (मधेस)मा संविधान दिवसलाई लिएर पनि विवाद हुने गर्दछ ।

संविधान दिवसका विषयमा प्रदेश नम्बर २ का दुई सत्ता साझेदार दल समाजवादी पार्टी र राजपा नेपालबीच विवाद उत्पन्न भएको छ ।

प्रदेश मन्त्रिपरिषद बैठकले भव्यताका साथ संविधान दिवस मनाउने निर्णय गरेपछि प्रमुख सत्ता साझेदार दल राजपाले भने त्यस्तो निर्णयप्रति असहमति जनाएको छ ।