शिल्पा पोखरेल र छविराज ‌ओझा ।

काठमाडौं – मोडल तथा नायिका शिल्पा पोखरेलले निर्माता छविराज ओझाविरुद्ध घरेलु हिंसा गरेको आरोप लगाउँदै उजुरी दिएकी छिन् । शिल्पा र छविराज ओझा पति-पत्नी भए पनि यी दुईले मिडियामा भने यो तथ्यलाई लुकाउँदै आएका थिए ।

महानगरीय प्रहरी परिसर काठमाडौंका प्रवक्ता होबिन्द्र बोगटीका अनुसार शिल्पाले ३ दिनअघि आफू घरेलु हिंसामा परेको उजुरी दिएकी हुन् । शिल्पाले दिएको उजुरीका आधारमा यी दुईलाई आज (बुधवार) छलफलका लागि बोलाइएको छ ।

शिल्पा र छविराजले वि.सं. २०७३ मा बिहे गरेका थिए । बिहे गरे पनि उनीहरुले सार्वजनिक रुपमा भने बिहे नगरेको बताउँदै आएका थिए । केही महिनाअघि मात्र निर्माता छविराज ओझाले एक अन्तर्वार्तामा आफू र शिल्पाले बिहे गरेको स्वीकारेका थिए ।

निर्माता ओझाले यसअघि नायिका रेखा थापासँग बिहे गरेका थिए । रेखा र छविबीचको सम्बन्ध सुमधुर हुन नसकेपछि यी दुईले डिभोर्स गरेका थिए । त्यसपछि छविले अभिनेत्री शिल्पा पोखरेलसँग बिहे गरेका थिए ।

म्युजिक भिडियोमा पनि सक्रिय शिल्पा पछिल्लो समय ओझाले नै निर्माण गरेको फिल्म ‘मंगलम्’ मा देखिएकी थिइन् । उक्त फिल्ममा शिल्पाले अभिनेता पुष्प खड्कासँग जोडी बाँधेकी थिइन् ।