काठमाडौं– भारतीय सहयोगमा सर्लाही र रौतहट जिल्लामा बाग्मती नदी नियन्त्रणका लागि सञ्चालित परियोजनामा करिब ९६ लाख रुपैयाँ बराबरको भ्रष्टाचार भएको खुलेको छ ।

अख्तियार दुरुपयोग अनुसन्धान आयोगले गरेको छानबिनबाट जल उत्पन्न प्रकोप नियन्त्रण कार्यालयका कर्मचारी र ठेकेदारको मिलेमतोमा ८५ लाख ९० हजार ६ सय २० रुपैयाँ बराबरको भ्रष्टाचार भएको भेटिएको हो ।

बाग्मती नदी नियन्त्रण आयोजनाको प्योकेज (सी)मा ५० लाख ६४ हजार ६ सय २० र प्याकेट (डी)मा ३५ लाख २६ हजार रुपैयाँ गरी कूल ८५ लाख ९० हजार ६ सय २० रुपैयाँ ठेकेदारलाई अग्रीम भुक्तानी जमानत रकम उपलब्ध गराइएको थियो । तर, कर्मचारीसँगको मिलेमतोमा उक्त रकम फिर्ता नगरिएको अख्तियारले जनाएको छ ।

अख्तियारले अनियमितता प्रकरणमा संलग्न रहेको भन्दै जल उत्पन्न प्रकोपट नियन्त्रण डिभिजन कार्यालय नम्बर ३, बाराका तत्कालीन प्रमुख हीराचन्द झासहित ५ जनाविरुद्ध मुद्दा दायर गरेको छ ।