काठमाडौं– नेपाल चेम्बर अफ कमर्सले दिउँसोको समयमा मालवाहक सवारी साधन गुड्न रोक लगाइएकोमा आपत्ति जनाएको छ ।

मालबाहक सवारी साधनमा रोक लगाइँदा औद्योगिक उत्पादनलगायत खाद्यान्न र अन्य दैनिक उपभोग्य वस्तु तथा निर्माण सामग्रीकोे राजधानीभित्र हुने आपूर्ति व्यवस्थामा असर पुग्ने भन्दै चेम्बरले आपत्ति जनाएको छ ।

यस विषयमा चेम्बरको टोलीले भौतिक पूर्वाधार तथा यातायात व्यवस्थामन्त्री रघुवीर महासेठको ध्यानकर्षण समेत गराएको छ । चेम्बरका अध्यक्ष राजेशकाजी श्रेष्ठले सवारी आवागमन सञ्चालनमा सहज तुल्याउन सडक निर्माण तथा प्रविधिमा सुधारजस्ता वैकल्पिक व्यवस्था गर्न सुझाव दिए ।

ट्राफिक व्यवस्थापनमा सहज गर्ने भन्दै मन्त्रालयले सार्वजनिक बिदाको दिनबाहेक बिहान ८ बजेदेखि साँझ ७ बजेसम्म आपत्कालीन र अत्यावश्यक सेवामा प्रयोग हुनेबाहेक अन्य समयमा मालबहाक ढुवानीका साधन सञ्चालनमा असार १ देखि रोक लगाउने निर्णय गरेको छ ।