एजेन्सी– आफ्नो मुलुकमा सेना राखेबापत दक्षिण कोरियाले अमेरिकालाई तिर्दै आएको रकम बढाउने भएको छ । अमेरिकाले आफ्नो मुलुकमा सेना राखेबापत यसअघि ९ खर्ब ६० अर्ब वन तिर्दै आएकोमा अब दक्षिण कोरियाले त्यसलाई बढाएर हरेक वर्ष १० खर्ब भन्दा बढी तिर्नेछ । यस विषयमा आइतबार हस्ताक्षर भएको दक्षिण कोरियाली विदेशमन्त्रालयले जनाएको छ ।

अमेरिकी राष्ट्रपति डोनाल्ड ट्रम्पले सुरक्षाका मामिलामा अमेरिकासँग निर्भर मुलुकहरुलाई आफ्नो उचित हिस्साको रकम तिर्न आग्रह गर्दै आएका थिए । त्यसैक्रममा दक्षिण कोरियासँग यस्तो सम्झौता भएको बताइएको छ । यो सम्झौता कार्यान्वयनमा आउनका लागि सुरुमा दक्षिण कोरियाको संसद्बाट पारित हुनुपर्ने प्रावधान छ ।

दक्षिण कोरियाले हरेक ५ वर्षमा नविकरण हुनेगरी अमेरिकासँग सुरक्षा सम्झौता गर्दै आएको छ । तर, पछिल्लो सम्झौताको म्याद भने केबल एक वर्ष छ । सन् १९५३ को कोरियाली युद्ध यता निरन्तर उत्तर कोरियाको सैनिक आक्रमणको भयका माझ दक्षिण कोरियामा २८ हजारभन्दा धेरै सैनिक तैनाथ छन् । अमेरिका र दक्षिण कोरियाले नियमित रुपमा संयुक्त बृहद सैन्य अभ्यास पनि गर्दै आएका छन् ।