काठमाडौं– कर्मचारी समायोजनमा असन्तुष्टि जनाउँदै स्वास्थ्य मन्त्रालयमा धर्ना दिने २५ जना चिकित्सक पक्राउ परेका छन् ।

कर्मचारी समयोजनमा चिकित्सकको दरबन्दी संघ अन्तर्गत हुनुपर्ने माग राख्दै स्वास्थ्यमन्त्रालय भित्र धर्नामा रहेका सरकारी चिकत्सक संघ (गोदान) का अध्यक्ष दिपेन्द्र पाण्डेसहित २५ जना चिकित्सकलाई प्रहरीले नियन्त्रणमा लिएको हो ।

आफ्नो माग सम्बोधन गर्न सरकारलाई दबाव दिँदै उनीहरु बिहान १० बजेदेखि नै स्वास्थ्यमन्त्रालयमा धर्ना दिन बसेका थिए । आफूहरुको शान्तीपूर्ण धर्नामा प्रहरीले हस्तक्षेप गरी लाठीचार्जसमेत गरेको गोदानका अध्यक्ष दिपेन्द्र पाण्डेले खबरहबलाई बताए ।

‘सरकारले हामीसँग गरेको सहमति कार्यन्वय गर्न माग गर्दै हामीले स्वास्थ्य मन्त्रालयमा शान्तिपूर्ण धर्ना दिएका थियौं, प्रहरीले साढे १ बजे हाम्रो शान्तिपूर्ण धर्नामा दमन गर्यो‍’ गोदानका अध्यक्ष पाण्डेले भने, ‘हाम्रा ३ जना चिकित्सक साथीहरु घाइते हुनुभएको छ । २५ जनालाई प्रहरीले गिरपर्तार गरेको छ ।’

प्रहरीको लाठीचार्जमा डाक्टर सुबोध ज्ञावली, डा. कपिल गौतम र डा. राकेश यादव घाइते भएको उनले बताए ।
स्वास्थ्य मन्त्रालयमा धर्ना दिने चिकित्सकलाई पक्राउ गरी नेपाल पुलिस क्लबमा राखिएको छ ।