एजेन्सी– म्यान्मारको रखायन राज्यमा विद्रोही लडाकुको आक्रमणमा ९ प्रहरीको ज्यान गएको छ । रखायन राज्यको यो ता योके गाउँमा आराकान आर्मी नामक समूहका लडाकुले प्रहरीलाई लक्षित गरी आक्रमण गरेका हुन् ।

स्थानीय समयअनुसार शनिबार अबेर भएको घटनाबारे अधिकारीले विस्तृत विवरण भने सार्वजनिक नगरेको अन्तर्राष्ट्रिय सञ्चारमाध्यमले जनाएका छन् ।

स्थानीय बौद्ध धर्मावलम्बीको रखानय जातीय समुदायको नेतृत्वमा गठन भएको आराकान आर्मी लडाकु समूहले आत्मनिर्णयको माग गर्दै हिंसात्मक आक्रमण गर्दै आएको छ ।

यो समूहले पछिल्लो डिसेम्बरयता प्रहरी तथा अन्य सुरक्षा बलविरुद्धको आक्रमणलाई तीब्रता दिँदै आएको बताइन्छ । सोही क्रममा गत जनवरीमा भएको यस्तै आक्रमणमा म्यान्मारका १३ प्रहरीको मृत्यु भएको थियो ।

रखायन राज्यमा सुरक्षा बलले मुसलमान धर्मावलम्बी रोहिङ्ग्या जातीय समुदायविरुद्ध गरेको ज्यादतीका कारण उसैपनि तनावग्रस्त रहेको रखायन राज्यमा बौद्ध धर्मावलम्बी आराकान जातीय समुदायको हिंसा बढ्दै गएको हो ।