काठमाडौं – अपिल विष्टले निर्देशन गरेको फिल्म ‘कागजपत्र’ को प्रचार थालिएको छ । चैत्र ८ गतेबाट रिलिज हुन लागेको यो फिल्मले राजधानीभित्रका ठूला सपिङ मलमा विभिन्न कार्यक्रम गरेर फिल्मको प्रचार थाल्ने जानकारी गराएको छ ।

निर्देशक विष्टका अनुसार दर्शकलाई फिल्मबारे जानकारी दिन प्रचार गरिने भएको हो ।

काठमाडौंको सिटी सेन्टरमा महाशिवरात्रिको मौका पारेर निर्माण टिमले प्रचारस्वरुप कार्यक्रम गरेको थियो । अब हरेक शनिवार राजधानीमा कार्यक्रम गरिने निर्माण टिमले जनाएको छ ।

फिल्मको कुरा गर्नुपर्दा नक्कली बिहे गरेर अस्ट्रेलिया जाने नेपालीको कथालाई फिल्ममा कथानक बनाइएको छ । यस्तै फिल्ममा नाजिर हुसेन, शिल्पा मास्के, भोलाराज सापकोटा, सरिता गिरी, लोकेन्द्र लेखक, लक्ष्मी बर्देवा, जीवन भट्टराई लगायतका कलाकारले अभिनय गरेका छन् । यो फिल्मको लेखन निर्देशक विष्टले गरेका हुन् ।

फिल्मको ट्रेलरले औसत प्रतिक्रिया पाए पनि यसको गीत ‘माया संसार’ ले भने राम्रो प्रतिक्रिया पाइरहेको छ ।