कोलम्बिया– कोलम्बियामा भएको विमान दुर्घटनामा १४ जनाको मृत्यु भएको छ । दक्षिणी शहर सान होजे डेल गुआभिरेबाट भियाभिकेनिको उडेको विमान डग्लस डीसी ३ विमान सान कार्लो डे गुआरोआ शहरनजिक दुर्घटनाग्रस्त भएको कोलम्बियाका नागरिक उड्ययन निकायले जनाएको छ ।

अधिकारीका अनुसार दुर्घटनाग्रस्त विमानमा सवार सबै १४ जनाको मृत्यु भएको हो । मृत्यु हुनेमा भाउपेस प्रान्तको एउटा सानो शहरका मेयर पनि रहेका छन् । स्थानीय समयअनुसार शनिबार बिहान १० बजेर ४० मिनेटमा विमानले आपतकालीन सन्देश पठाएको जनाइएको छ ।

विमान दुर्घटना हुनुको कारणबारे स्पष्ट भइनसकेको अधिकारीले जनाएका छन् । विमान उडाउनुअघि जाँच गर्दा विमानको प्राविधिक पक्ष पनि ठिक रहेको तथा विमान चालकको स्वास्थ्य अवस्था पनि सामान्य नै रहेको विमान सेवा प्रदायक कम्पनी लेजर एरियो एअरलाइन्सले जनाएको छ ।