काठमाडौं– वैदेशिक रोजगार व्यवसायी महासंघका अध्यक्ष रोहन गुरुङको घरमा बम विस्फोट गराइएको विरोधमा आज देशभरका म्यानपावरले काम ठप्प पारेका छन् ।

शुक्रवार राति बसुन्धारास्थित गुरुङको निवासमा विस्फोट गराइएको थियो । विस्फोटमा गुरुङको सवारीमा क्षति पुगेको थियो भने भने घरमासमेत क्षति भएको छ ।

अध्यक्ष गुरुङको घरमा भएको विस्फोटको विरोध गर्दै म्यानपावर व्यवसायीहरुले आज (आइतबार) आफ्ना काम रोकेका छन् ।

विस्फोटको विरोधमा र व्यवसायको सुरक्षाको माग गर्दै आज विरोध स्वरुप कामकारवाही नगर्ने वैदेशिक रोजगार व्यवसायी महासंघका महासचिव नरेश गेलालले बताए ।

करिब १४ सय म्यानपावर दर्ता भएपनि देशभर ७ सय ५४ म्यानपावर सञ्चालनमा रहेका छन् ।

युवा संगठनले लियो जिम्मा

गुरुङको घरमा आफूहरुले बम विस्फोट गरेको विप्लव नेतृत्वको युवा संगठनले दाबी गरेको छ ।

युवा संगठनले टप जव्स प्राइभेट लिमिटेडका म्यानेजिङ डाइरेक्टर समेत रहेका मेनपावर व्यवसायी महासंघका अध्यक्ष रोहन गुरुङलाई कारबाही गरेको दाबी गरेको छ ।

शनिवार राति एक विज्ञप्ति जारी गर्दै घटनाको जिम्मेवारी लिएको छ । विज्ञप्तिमा भनिएको छ,‘आफूहरुले बारबार चेतावनी दिँदा पनि नमानेको हुँदा युवा संगठनले बाध्य भएर कारवाही गरेका छौं ।’

वैदेशिक रोजगारी दिन्छु भनेर ठगी गर्ने र वैदेशिक रोजगारीका नाममा मानव तस्करी गरेकोले कारवाही गरेको र आगामी दिनमा त्यसो नगर्न संगठनले वैदेशिक रोजगार व्यवसायीलाई चेतानी दिएको छ ।