भक्तपुर–प्रधानमन्त्री केपी शर्मा ओलीले उद्घाटन गरेको भक्तपुरको सुर्वर्णेश्वरदेखि तीनधारेसम्म जाने मोटरबाटोको स्थानीयबासीले स्तरोन्नती गरेका छन् ।

भक्तपुरका सांसद महेश बस्नेतको उपस्थितिमा प्रधानमन्त्री ओलीले उद्घाटन गरेको बाटोमा खाल्डाखुल्डी पर्नुका साथै सडक भएर बग्ने पानीका कारण हिलो भएपछि स्थानीयबासी आफैं जुटेर सडकलाई सफा गरेका छन् ।

आफ्नो घरसम्म जाने बाटोको सफाइमा आफैं जुटौं भन्दै त्रिवेणी टोलका स्थानीयले शनिबार बिहानै स्वत:स्फुर्त रुपमा बाटोको सफाइ गरेको टोल विकास समितिका अध्यक्ष गणेशप्रसाद घिमिरेले जानकारी दिए ।

आफ्नो क्षेत्रको समृद्धिका लागि आफैं जुट्नुपर्छ भन्ने सन्देश दिनका लागि यो अभियान चलाइएको अध्यक्ष घिमिरेले बताए ।

शनिबार बिदाको दिनको सदुपयोग गर्दै सडकका खाल्डाखुल्डी पुर्नुका साथै घरबाट निस्केको पानी सडकमा बग्न थालेपछि त्यसलाई सडक किनाराबाट बग्ने गरी व्यवस्था मिलाइएको पनि घिमिरेले बताए ।

जनश्रमदान मार्फत सूर्यविनायक नगरपालिका वडानम्बर ५ का स्थानीयले सडक सफाइ गरेको वडा नम्बर ५ का वडाध्यक्ष बासुदेव पोखरेलले बताए ।

स्थानीयको सक्रियताका कारण यस्ता काम गर्न आफूलाई थप हौसला मिलेको पनि उनले बताए ।

सडक सफाइ अभियानमा जुटेका स्थानीयबासी तथा वडाबासीलाई पोखरेलले धन्यवाद दिएका छन् ।