मस्को– रुसको राजधानी मस्कोमा भएको निर्वाचनमा राष्ट्रपति भ्लादिमिर पुटिनलाई समर्थन गर्ने युनाइटेड रसिया पार्टीले एक तीहाई सिट गुमाएको छ ।

पछिल्लो समय निर्वाचनमा विपक्षीलाई निर्वाचनमा सहभागि हुन कडाई गर्ने नीतिको विरोधमा प्रदर्शन भएपछि मस्कोको संसद्मा युनाइटेड रशिया पार्टीलाई धक्का लागेको हो ।

रुसको रिया समाचार संस्थाले जनाएअनुसार आइतबार भएको निर्वाचनमा युनाइटेड रशिया पार्टीले मस्कोको संसद्मा ४५ मध्ये केबल २६ सिट जितेको छ । यसअघि युनाइटेड रशिया पार्टीका २८ तथा यो पार्टी निकट १० जना विजयी भएका थिए ।

अर्कोतर्फ रुसी कम्युनिष्ट पार्टीले यसअघि ५ सिट जितेकोमा यसपटक भने १३ सिट जित्न सफल भएको छ । त्यस्तै, विपक्षी पार्टीहरु याब्लोको पार्टी र फेयर रशिया पार्टीले समान तीन सिट जितेका छन् ।

आइतबार रुसका सबै ११ समयक्षेत्रमा स्थानीय निर्वाचन भएपनि मस्कोको निर्वाचनलाई भने निकै महत्वका साथ हेरिएको थियो ।