काठमाडौं– ईस्लाम धर्मावलम्वीहरुको चाँड ईद अल अधाको अवसरमा खाडी मुलुकमा एक हप्ता विदा हुने भएको छ ।

मुस्लीम धर्मावलम्बीहरुले आगामी अगस्ट ११ देखि १५ सम्म ईद अल अधा मनाउँदै छन् । उक्त अवसरमा खाडीका विभिन्न देशमा कार्यरत विदेशी कामदारले पनि एक हप्ता विदा पाउने भएका छन् ।

त्यसमध्ये तीन दिन चाँहि कामदारले तलबसहितको बिदा पाउने छन् । अनिवार्य सेवाका भएपनि ईदको पहिलो दिन विदेशी कामदारहरुले अनिवार्य बिदा पाउने छन् ।

कतार सरकारले ईदका अवसरमा सरकारी कार्यालयमा ५ तथा निजी क्षेत्रमा तीन दिनको बिदाको घोषणा गरेको छ। कतारस्थित नेपाली दूतावासले अगस्ट ११ र १२ तारिखमा कार्यालय विदा गरिने सूचना प्रकाशित गरेको छ ।

साउदीस्थीत नेपाली दूतावासले ईदको समयमा सतर्क रहन नेपाली कामदारसहित नेपाली समुदायलाई आग्रह गरेको छ ।

दूतावासले विज्ञप्ति जारी गर्दै ईदमा लामो छुट्टी हुने भएकाले मद्यपान गरी झगडा नगर्न तथा उक्त समयलाई खेलकुद, भेटघाट तथा रमाइलो गर्दा सहज रहन आग्रह गरेको छ । यस्तै, ओमन, कुवेत, बहराइनलगायतका देशले पनि अधाको अवसरमा नियोग बन्द हुने जनाएका छन् ।