काठमाडौं–  पछिल्लो समय वैदेशिक रोजगार विभागले रोजगारीपीडितका उजुरीहरुको सुनुवाई गर्नमा तीव्रता दिइएको जनाएको छ । पीडितहरुले छिटोभन्दा छिटो न्याय पाउने गरी क्रमिक रुपमा पुराना उजुरीहरुको सुनुवाईलाई तीव्रता दिइएकाे विभागले जनाएकाे छ ।

पुराना उजुरीहरुका सम्बन्धमा फाइल अध्ययन गरेर पीडितलाई सम्पर्क गर्ने आग्रह गरेका वैदेशिक रोजगार विभागका महानिर्देशक डा भीष्मकुमार भुसालले जानकारी दिएका छन् । सात सय ४ वटा उजुरीहरुको छानवीन गरी यो सूचना प्रकाशित गरेको उनले जानकारी दिएका छन् ।

वैदेशिक रोजगारीको लागि विभिन्न इजाजत प्राप्त संस्था (म्यानपावर) मार्फत गएका तर करार वमोजिम काम, सेवा सुविधा नपाएको भनि विभागमा उजुरी दर्ता गरेका निवेदकहरुलाई विभागमा सम्पर्क गर्न भनिएको महानिर्देशक भुसालले बताए ।

लामो समयसम्म पनि सम्पर्क नभएका र संस्थाबाट सूचना लगायतका विभिन्न प्रयासबाट सम्पर्कमा नआएका उजुरीकर्ताहरुको नामावलीसिहत सूची विभागको वेभसाइटमा पनि राखिएको विभागले जनाएको छ ।

सूचीमा उल्लेखित उजुरीकर्ताले आवश्यक प्रमाणसहित आफ्नो गुनासो सम्बोधनको लागि विभागमा सम्पर्क गरेमा सो छानबिन गरी आवश्यक निर्णय गरी क्षतिपूर्ति दिलाईने विभागले जानकारी गराएको छ ।