काठमाडौं– आईसीसी एकदिवसीय विश्वकप क्रिकेटको जारी खेलमा भारतले अस्ट्रेलियालाई ३ सय ५३ रनको विजयी लक्ष्य दिएको छ ।

दी ओभललमा भइरहेको खेलमा टस जितेर पहिलो ब्याटिङ गरेको भारतले ५० ओभर पूरा खेल्दै ५ विकेट गुमाएर ३ सय ५२ रन बनायो । भारतका ब्याट्सम्यानहरुले उत्कृष्ट पारी खेल्दा अस्ट्रेलियाले ३ सय ५३ रनको विशाल लक्ष्य पाएको हो ।

भारतका लागि ओपनिङ ब्याट्सम्यान शिखर धवनले शतक पूरा गर्दा अर्का ओपनिङ ब्याट्सम्यान रोहित शर्मा र तेस्रो विकेटका रुपमा मैदान छिरेका कप्तान विराट कोहलीले अर्धशतक पूरा गरे ।

भारतका लागि शिखर धवनले सर्वाधिक १ सय १७ रन बनाए । उनले १ सय ९ बलको सामना गर्दै १६ चौका प्रहार गरे । यस्तै, कप्तान कोहलीले ८२ रन बनाउँदा शर्माले ५७ रन र हार्दिक पाण्ड्याले ४८ रन बनाए । पाण्ड्याले ३ छक्का र ४ चौका प्रहार गरे ।

यस्तै, विकेटकिपर ब्याट्सम्यान महेन्द्रसिंह धोनीले २७ रन बनाए । भारतविरुद्ध अस्ट्रेलियाका बलरले अपेक्षा अनुरुप बलिङ गर्न सकेनन् । तर, पनि भारतविरुद्ध मार्कस स्टोनिसले २ विकेट लिए भने पेट कुमिन्स, मिचेल स्टार्क र नाथन कौल्टेर निलले समान एक–एक विकेट लिए ।