काठमाडौं – महानायकको उपाधि पाएका राजेश हमाल उमेरले ५० कटिसकेका छन् । तर उनको जोश अझै उस्तै छ, जस्तो जोश उनी यो क्षेत्रमा आउँदा थियो । नेपाली अभिनेतामा बौद्धिक अभिनेताका रुपमा समेत चिनिने राजेश हमाल हालै टेलिभिजन शो ‘को बन्छ करोडपति’ मार्फत दर्शकमाझ आएका थिए ।

उनको व्यस्तता त खासै घटेको छैन, तर उनी फिल्म क्षेत्रबाट भने झण्डै विश्राम लिएको अवस्थामा छन् । उमेरका हिसाबले हमालले निकै ढिलो बिहे गरेका थिए । मधु भट्टराईसँग बिहे गरेका हमालले अहिले आफ्नो वैवाहिक जीवन खुशीसाथ मनाइरहेका छन् । बिहेपछि भने उनलाई फ्यानले सोध्न थालेका छन् – अब बाबु कहिले बन्ने ?

महानायक राजेश हमाल पछिल्लो समय फिल्ममा खासै नदेखिए पनि उनी सामाजिक सञ्जालमा पनि सक्रिय रहने गर्छन् । बेलाबेलामा हमालले सामाजिक सञ्जालमा तस्वीरहरु शेयर गरेर आफ्नोबारेमा अपडेट दिइरहेका हुन्छन् । अर्कातिर सामाजिक सञ्जालमा फ्यानले हमाललाई खुबै ट्रोल बनाइरहेका हुन्छन् ।

रमाइलो कुरा त आफू ट्रोल बने भने राजेश हमालले ती ट्रोल अरुलाई सुनाएर आफैले मजा लिन्छन् । महाशिवरात्रीको दिन शेयर गरेको ट्रोल पनि यस्तै थियो ।

कसैले हमालको तस्वीरलाई शिवजीको तस्वीरझैँ देखिने गरी डिजाइन गरेर सामाजिक सञ्जालमा शेयर गरिदिए । उक्त तस्वीर राजेश हमाल आफैले पनि शेयर गरे । कतिपय अन्तर्वार्तामा पनि हमालले आफूमाथि बनेका जोक्स सुनाएर रमाइलो गर्ने गर्छन् ।

आइतवार (आज) राजधानीमा रातो मच्छिन्द्रनाथको भोटे जात्राको अवसरमा उपत्यकामा विदा दिइएको थियो । उक्त विदा र राजेश हमालको जन्मदिन पारेर एक फ्यानले सामाजिक सञ्जालमा लेखे, ‘रातो मच्छिन्द्रनाथको भोटे जात्रा त बहाना मात्र हो, खासमा आज त राजेश दाइको जन्मदिन भएर आज विदा दिइएको रे !’