काठमाडौं – शुक्रवारबाट रिलिज भएको फिल्म ‘समर लभ’ ले आज (शनिवार) दर्शकको साथ पाएको निर्माण टिमले जनाएको छ । पहिलो दिनको तुलनामा आज काठमाडौं तथा मोफसलका विभिन्न हलमा फिल्मले राम्रो व्यापार गरेको निर्देशक मुस्कान ढकालले जानकारी दिए ।

विशुद्ध प्रेमकथामा आधारित यो फिल्म सुबिन भट्टराईको उपन्यास ‘समर लभ’ मा आधारित छ । समीक्षात्मक रुपमा मिश्रित प्रतिक्रिया पाएको यो फिल्मलाई दर्शकले भने रुचाएका छन् ।

पुस्तकमा आधारित भएकाले कतिपयले उपन्याससँग तुलना गरेपनि फिल्मले मन छोएको र दर्शकले निकै मन पराएको निर्देशक ढकालले बताए । काठमाडौंका विभिन्न हलमा पुगेर आफूले प्रतिक्रिया बटुलेको समेत ढकालले बताए । साथै उनले हिजोको तुलनामा आज हलमा दर्शक बढेको उनले स्वीकारे ।

‘हलबाट दर्शक रुँदै निस्कनुभएको छ, काठमाडौं मात्र होइन, मोफसलमा पनि राम्रो प्रतिक्रिया पाएको छु ।’, उनले भने ।

झण्डै तीन वर्ष लगाएर निर्माण गरिएको यो फिल्म नेपालभर मल्टिप्लेक्स तथा सिंगल थियटरमा चलिरहेको छ ।