काठमाडौं– मलेसियामा ९ जना नेपालीसहित १ सय जना आप्रवासी कामदार पक्राउ परेका छन् । पक्राउ पर्नेमा ९ जना नेपाली, ६८ जना बंगलादेशी, ३६ जना इण्डोनेसियन र ७ जना म्यानमारका नागरिक रहेको स्थानिय सञ्चारमाध्यमका समाचारमा उल्लेख छ ।

अवैधानिक रुपमा काम गरिरहेका, कागजात नभएका र सम्झौता अवधि सकिए पनि आफनो देश नफर्कि रोजगारी गरिरहेका आप्रवासी कामदारमाथि मलेसियाको अध्यागमन विभागले धरपकड गरेर नियन्त्रणमा लिएको हो ।

अध्यागमनका कर्मचारीले बिहीवार सिटी सेन्टरमा जाँच गर्दा अवैध रुपमा काम गरिरहेका कामदार पक्राउ परेका हुन् ।

मलेसियामा आफ्नो देशमा अवैधानिक रुपमा रहेका कामदारलाई वैधानिक बन्न वा देश फर्किन दुई पटक मौका दिएको थियो । त्यसपछि वैधानिक नबनेका कामदारलाई पक्राउ गर्ने अभियान सुरु गरिएको जनाइएको छ । अवैधानिक रुपमा रहेका कामदारहरुलाई पक्राउ गर्ने क्रम जारी रहेको भन्दै यो क्रमलाई निरन्तरता दिने अध्यागमनले जनाएको छ ।