मुस्ताङ- हिमाल पारीको जिल्ला मुस्ताङस्थित जोमसोम विमानस्थल स्तरोन्नतिको काम शुरु भएको छ । पर्यटकीय तथा हिमाली जिल्ला मुस्ताङस्थित विमानस्थलको धावनमार्गको ग्रेड सुधार र कालोपत्र थप गर्न लागिएको नागरिक उड्डयन प्राधिकरणले जनाएको छ ।

८ सय १५ मिटर लामो धावनमार्गको २ सय १५ मिटरको ग्रेड सुधार गरिने आयोजना प्रमुख कृष्णप्रसाद पौडलेले जानकारी दिए । त्यस्तै हाल तीन सेन्टिमिटर बाक्लो पिच भएको धावनमार्गमा थप चार सेन्टिमिटर कालोपत्र थप गरिने उनले बताए ।

विमानस्थल स्तरोन्नतिका लागि प्राधिकरण र एपेक्स कन्स्ट्रक्सनबीच गत असोजमा नौ करोड रुपैयाँमा ठेक्का सम्झौता भएको थियो । आगामी दुई महिनाभित्रमा स्तरोन्नतिको काम सम्पन्न हुने आयोजनाले जनाएको छ ।

विमान अवतरण नहुने समयमा स्तरोन्नतिको काम हुने छ । जोमसोम विमानस्थलमा दिउँसो अत्यधिक हावा चल्ने भएकाले उक्त समयमा जहाज अवतरण तथा उडान हुँदैन ।