काठमाडौं–नेपाल कम्युनिस्ट पार्टी नेकपाका अध्यक्ष पुष्पकमल दाहाल प्रचण्डले आफ्नो वैवाहिक वर्षगाँठ मनाउँदैछन् ।

पत्नी सीतासँग वैवाहिक सम्बन्धमा बाँधिएको ५० वर्ष पूरा भएको उपलक्ष्यमा पारिवारिक जमघटसहित वैवाहिक वर्षगाँठ मनाउने प्रचण्डको तयारी छ ।

प्रचण्डको सचिवालयका अनुसार छोरीहरुले आफ्ना बुबाआमाको ५० औ वैवाहिक वर्षगाँठलाई स्मरण योग्य बनाउन पारिवारिक जमघट राखेको जानकारी दिएको छ । अहिले सामाजिक सञ्जाल तथा केही सञ्चार माध्यममा आएको ‘प्रचण्डको पुनः बिहे’ भन्ने शीर्षकका समाचार गलत भएको सचिवालयको दाबी छ । यो विशुद्ध पारिवारिक भेटघाट रहेको सचिवालयले जनाएको छ ।

नेतृत्व तहमा पुगेका व्यक्तिको पनि पारिवारिक जीवन हुने भन्दै सचिवालयले छोरीहरु रेणु दाहाल र गंगा दाहालले बुबाआमालाई खुसी बनाउन सानो भेला आयोजना गरेको जनाएको छ ।

यो जमघटमा प्रचण्डको नजिकका व्यक्तिलाई आमन्त्रण गरिएको छ ।