काठमाडौं– भोजपुरबाट टक्सार, कोट र गगने हुँदै लेकखर्क जोड्ने सडकमा करोडौं रुपैयाँको आर्थिक अनियमितता भएको फेला परेको छ ।

अख्तियार दुरुपयोग अनुसन्धान आयोगको अनुसन्धानबाट उक्त सडक विस्तारमा १ करोड १० लाख ८० हजारको भ्रष्टाचार भएको फेला परेको हो ।

तत्कालीन जिल्ला प्राविधिक कार्यालय भोजपुरले उन्नति कार्यक्रमअन्तर्गत शुरु गरेको सडक परियोजनामा प्राविधिक कार्यालयकै तत्कालीन प्रमुखसहितका कर्मचारीको संलग्नतामा भ्रष्टाचार भएको अख्तियारको ठहर छ ।

उक्त सडक परियोजनाको ठेक्का सम्झौता गर्दा ठेकेदार कम्पनी एमके निर्माण प्रालि र वाइपी कन्सट्रक्सनका नाममा नक्कली धितो देखाइ भुक्तानी दिइएको देखिएको हो ।

कृषि विकास बैंकको मुख्य शाखा कार्यालय काठमाडौंको रत्नर्पार्कका तत्कालीन शाखा अधिकृत छविलाल ढकाल समेतको मिलेमतोमा नक्कली धितोमा बैंक ग्यारेन्टी देखाएर रकम चलाइएको अख्तियारको अनुसन्धानबाट खुलेको छ ।

अख्तियारले जिल्ला प्राविधिक कार्यालयका तत्कालीन प्रमुख लालु गिरी, लेखापाल रामबहादुर दहाल, कृषि विकास बैंकको रत्नपार्क शाखाका तत्कालीन शाखा अधिकृत छविलाल ढकालविरुद्ध १ करोड १० लाख ८० हजार रुपैयाँ बिगो तथा जरिवाना र कैद सजाय माग दाबी गर्दै मंगलबार विशेष अदालतमा मुद्दा दायर गरेको छ ।

यस्तै एमके निर्माण प्रालिका प्रवन्ध निर्देशक माधवप्रसाद खनाल र वाइपी कन्स्ट्रक्सनका प्रवन्ध निर्देशक राजु श्रेष्ठविरुद्ध पनि अख्तियारले १ करोड १० लाख ८० हजार बिगो तथा जरिवाना र कैद सजाय माग दाबी गर्दै भ्रष्टाचार मुद्दा दायर गरेको छ ।

अख्तियारले एमके वाइपी जेभीका आधिकारिक प्रतिनिधि रणधिर तुम्बाविरुद्ध ५५ लाख ३० हजार र देवजंग शाहीविरुद्ध ५ लाख ५५ हजार रुपैयाँ बिगो दाबी तथा जरिवाना र कैद सजाय माग दाबी गर्दै भ्रष्टाचार मुद्दा दायर गरेको छ ।