काठमाडौं – वल्ड एन्टी डोपिङ एजेन्सी (वाडा) ले रसियालाई खेल गतिविधिमा प्रतिवन्ध लगाएको छ । वाडाको प्रतिवन्धसँगै रसियाले सन् २०२० को टोकियो ओलम्पिक र सन् २०२२ को फिफा विश्वकप खेल्न नपाउने भएको छ ।

४ वर्षको प्रतिवन्ध लागेको रसियाका कुनै खेलाडीले आफु डोपिङमा संलग्न नभएको प्रमाणीत गरेमा तटस्थ झण्डामा खेल्न पाउने वाडाले जनाएको छ । स्विटजरल्यान्ड्समा बसेको वाडाको कार्यसमिती बैठकले रसियामाथि प्रतिवन्ध लगाउने निर्णय सर्वसम्मत गरेको हो ।

रसियन एन्टी डोपिङ एजेन्सी (रुसाडा) ले रसियामा भएको भनिएको डोपिङका प्रमाणलाई ‘मेनिपुलेट’ गरेको भन्दै प्रतिवन्ध लगाउने निर्णय गरेको हो ।

वाडाले रुसाडालाई प्रतिवन्धविरुद्ध अपिल गर्न २१ दिनको म्याद दिएको छ । यदि रुसाडाले अपिल गरेमा उक्त मुद्दा कोर्ट अफ आर्विटेसन (कास) मा चल्नेछ ।